Landlæknisembættið - Directorate of Health

09.11.2009

Inflúensa A(H1N1)v 2009 staðfest í svínum

Inflúensa A(H1N1)v 2009 hefur verið staðfest í svínum á einu svínabúi í Eyjafirði. Sýni sem voru tekin föstudaginn 6. nóvember voru send til rannsóknar á Tilraunastöð HÍ að Keldum þar sem inflúensan var staðfest. Til að hindra útbreiðslu smits til annarra búa hefur bann verið sett á flutning dýra frá búinu og sóttvarnir hertar.

Engin tengsl eru talin vera milli þessara sýkinga og fyrstu staðfestu greiningar á svínainflúensu í svínum á Minni-Vatnsleysu.

Einkenni inflúensu í svínum eru m.a. hár hiti og lystarleysi, kvef og hósti. Svínin ná sér oftast eftir þriggja til sex daga veikindi.

Almennt gildir að óheimilt er að slátra veikum dýrum og á þetta jafnt við um svínaflensu sem aðra sjúkdóma. Ekki er ástæða til að banna slátrun einkennalausra svína þótt önnur svín á búinu séu veik, en slátrun frá búinu hefur verið frestað vegna banns á flutningi dýra til og frá búinu.

Ekkert bendir til að svínaflensa smitist með svínakjöti og fólki stafar því engin hætta af neyslu þess.

Sóttvarnalæknir